KALIBO Aklan–Gindaea eon kahapon sa Capiz Provincial Office para ipaidaeom sa drug test ro sangka 42 anyos nga construction worker matapos nga maaresto sa ginpatigayon nga drug buy-bust operation kahapon it hapon sa F. Quimpo, Corner Pastrana St. Brgy. Poblacion, Kalibo.
Raya ro ginpahayag ni Police Major Frensy Andrade it Provincial Drug Enforcement Unit (PDEU)-Aklan.
Kaibahan sigon ro katapo it Philippine Drug Enforcement Unit ukon PDEU hay gindaea ro suspek nga si John Kay Quimpo Pallada, alyas Bugoy ag residente it Sto Niño Village Poblacion Kalibo sa nasambit nga pasilidad samtang ro mga narekober nga droga hay nakataeana man nga igapaidaeom sa chemical analysis.
Ginpahayag dugang nga si Pallada hay naboe-an it pulisya it tatlong plastic sachet nga may sueod nga ginadudahan nga shabu ag buy-bust money nga P2,500.
Nasayuran nga antes daeayon nga arestuhon ro suspek hay haeos pilang buean man nga ginsurveillance raya it mga otoridad.
Sa pihak nga parte, padayon nga nagapadumdum si Andrade sa mga padayon nga nagaduso it ilegal nga droga nga punduhon eon ro pagbaligya kara agud maprotektahan ro bwas damlag it mga pamatan-on ag malikawan ro pagkasamad it ginabilog nga pamilya.