KALIBO, Aklan—Bangud sa brutal nga pagpatay sa anang tiyo nga si Rex Quindong ko nagtaliwan nga Oktubre 8 it gabi-i, ginpasakaan eon it kasong murder ro suspek nga si Edsel Quindong, 22 anyos it Sitio Maeobog, Barangay Calizo, Balete.
Suno kay P/Major Bryan Alamo, hepe it Balete Municipal Police Station nga ginpasaka eon ro nasambit nga kaso ko adlaw it Lunes kaibahan ro igmangud it biktima nga nagatindog nga complainant pinaagi sa regular filing sa Aklan prosecutors office.
Gin klaru pa nana nga indi pa direktang makapatigayon it preliminary investigation bangud nga igapaidaeum pa raya sa case build up agud nga mas pang mapabaskog ro kaso antes nga igapasaka sa korte.
Madumduman nga Rex Quindong hay makapilang beses nga gin-eabu samtang nagakatueog sa sueod it anang baeay.
Samtang, gindugang pa ni P/Major Alamo nga engkaso nga owa nabaril patay it motorcycle riding suspek si Marte Dalida sa Brgy. Libas, Banga hay kaibahan imaw sa mga ginkasuhan bangud sa mga mabaskog nga ebidensiya nga may kahilabtanan imaw sa krimen.
Nasayuran nga nauna eon nga na-detain si dalida sa Balete police custodial facility kasunod it hacking incident.
Apang makataliwan ro tatlong adlaw, imaw hay napahilway bangud sa pag-lapse it reglamentary period.
