KALIBO, Aklan—Boluntaryong nagsurrender sa Kalibo Police Station ro 47-anyos nga suspek nga nag-eabo sa mag-ama nga ginkamatay it sambilog samtang sa kritikal nga kondisyon ro sambilog pa sa adlaw mismo it paskwa sa Sitio Soebod, Brgy. Poblacion, Tangalan.
Suno kay Mrs. Edna Ordas-Tiangga, una sa idaeom it impluwensya it makahieilong nga ilimnon ro suspek nga si Ronnie Villa, tumandok it Mambusao, Capiz kat matabo ro krimen.
Ginasugid nga ginsita eamang kara ro suspek matapos imaw nga makabati it sangkiri nga argumento sa tunga nandang mag-asawa.
Apang, ginkaakig sigon raya it suspek hasta sa nagbahoe ro diskusyon ag nabatian eon raya it mag-amang Jeserie Ordas, sa legal nga edad ag Reymer Ordas, 20-anyos.
Kaangot kara, patay eon kat makaabot sa Aklan Provincial Hospital ro biktimang si Reymber bangud sa nakaangkon nga fatal nga igo it pag-eabo sa legog ag likod samtang nagapabilin nga kritikal ro kondisyon it anang amang si Jeserie matapos mag-angkon it igo sa eawas ag naputoe gid ro anang butkon.
Nasayuran nga ro suspek ag si Jeserie hay magbayaw.
Unang gin-eabo it suspek ro naga-agi eamang nga si Reymer ag kat hana nga tabangan it anang amang si Jeserie hay imaw man ro ginbalingan ag gin-einabu it makapilang beses.
Sa makaron hay sa paghinakop eon it Tangalan Police Station si Villa kung siin magapangatubang raya sa kasong frustrated murder ag murder.//
Sa pihak nga parte, Aminado man ro suspek nga si Ronnie Villa, 47-anyos, tumandok it Mambusao, Capiz sa anang nahimo nga krimen.
Apang, ginpamilit kara nga bukon nana raya it intensyon ag naimpito eamang sigon imaw rason nga nahimo nana raya sa mag-amang Ordas.
Suna kay Villa, engkaso nga magpasugot ro pamilya it mga biktima nga magsettle hay haum sigon imaw nga magtao it sustento sa naaywan nga pamilya ni Reymer.
