KALIBO, Aklan—Magapangatubang sa kasong murder ro sangka retiradong army nga bumaril-patay sa anang 58-anyos nga kasimaryo bandang ala-1:40 it aga-aga sa Barangay Navitas, Numancia.
Suno kay Mrs. Amalia Palomar, asawa it biktimang si Rowen Palomar nga positibo imaw nga ro nadakpang suspek nga si Teddy Rivera, 57-anyos ag residente man it nasambit nga lugar ro pumatay sa anang asawa samtang nga magkaibahan sanda nga nagakatueog sa andang sala.
Nagatakilid suno kana ro anang mister kat barilon ni Rivera sa anang tuo nga dungan-dungan, kun sa siin ro bala hay eumapos sa anang dueonggan.
Sa mayad nga swerte suno kana ag owa imaw natamaan it bala.
Samtang, ginkumpirma pa it ginang nga antes nga natabu ro pagpamaril hay uman sanda nga nakabaton it summon sa barangay sa ikatlong kahigayunan, apang owa gihapon nanda raya ginbaton bangud nga owa man sigon idtu nakabutang kon ano ro ginareklamo kanda ni Rivera.
Nakaangkon eamang sigon it bagina ro daywa may tatlong dag-on eon ro nagtaliwan.
Sa pihak nga parte, ginsaysay pa it misis nga antes sanda nga nagkatueog hay naging masadya pa sanda it mister sa paghampang sa cellphone, kun sa siin hay nagapataas taas sanda it score.
Kabay suno kana nga makonsensiya ro suspek sa anang ginhimo nga krimen.
Ginapatihan nga nag-agi ro suspek pasueod sa andang under construction nga baeay sa bintana sa may andang lababo.
