KALIBO, Aklan—Nainquest eon sa kasong homicide ro suspek nga si Janjan Colas, 25-anyos, tumandok it Brgy. Dalagsaan, Libacao apang presenteng naga-istar sa Oyo Torong St., Brgy. Poblacion, Kalibo.
Si Colas ro ginaturo nga responsable sa pagbuno-patay sa biktimang si Romel Aros, tumandok it Brgy. Santander, Buruanga apang temporaryong naga-istar sa nasambit nga lugar kon siin ginhimo ro krimen sa idaeom it Numancia-Kalibo Bridge.
Suno kay Police Senior Master Sargeant Emil Milleondaga, imbestigador it Kalibo Municipal Police Station, kapin sa P120,000 ro gintaeana nga pyansa it korte para sa temporaryong kahilwayan it nasambit nga suspek.
Nauna eon nga boluntaryong nagsurender sa taeatapan it pulisya ro suspek matapos nga tub-eagon it anang konsensya sa krimen nga ginhimo.
Aminado raya nga bukon sanda it magkakilaea it biktima kon siin nasub-eang eamang nana raya sa nasambit nga lugar samtang naga-uli sa anang ginadayunan nga baeay.
