KALIBO, Aklan—Ginabuytan eon it Kalibo Municipal Police Station ro suspek sa pagpatay sa 49-anyos nga babayeng negosyanteng si Marissa Flores sa Crossing New Buswang, Kalibo ko gabi-i it Enero 6, 2024.
Raya hay matapos nga nauna eon nga nagsurender sa mga awtoridad ro driver it motorsiklo nga ginagamit nga get-away vehicle suspek sa pagpaeagiw matapos nga mahimo ro krimen.
Positibo kara nga ginturo ro suspek nga nagbuno kay Flores nga ana man nga kabarkada.
Suno kay P/Major Willian Aguirre, Deputy Chief of Police it Kalibo Municipal Police Station nga pagpanakaw ro pinaka-motibo sa krimen.
Ginsaysay it driver it motorsiklo nga matapos sigon nga maka-ubos sanda it pilang bote it beer nga andang ginbakae sa baraka it biktima hay nagtabok ro suspek agud nga i-uli ro mga bote.
Apang gintakaw kara ro bueutangan it kwarta it negosyante nga may sueod nga nagkaeain-eain nga denomination rason nga nagsukoe ro babaye ag dikara imaw nabun-an it makapilang beses nga gintunaan it anang kamatayon.
Nakita sa CCTV footage nga nagadaeagan paguwa it baraka ro suspek bitbit ro bueutangan it kwarta.
Nasayuran nga nag-abot ko ulihi sa kabilugan nga P100,000 pesos ro reward money sa makaturo sa suspek.
Raya hay matapos nga gindoble ni Mayor Juris Sucro ro ginpaguwa nga padya nga P25,000 ag gindugangan pa ni Senador Raffy Tulfo it P50,000.
Nauna eon nga nagpangayo it tabang ro mga unga it biktima kay Senador Tulfo.
