Kalibo Aklan ———-Una eon sa paghinakop it pulisya ro sangka 77-anyos nga eaeaki nga responsable sa pagbuno sa anang kainuman bandang alas-8:48 kabie sa Brgy. Fulgencio, Balete.
ginkilaea ni PSSgt. Liezel Rimaldora it Balete PNP ro suspek nga si Florentino Sarabia samtang ro biktima hay si Alex Peñaflor, 37-anyos, mga manug gaeab ag parehong residente it nasambit nga lugar.
Base sa inisyal nga imbestigasyon it mga otoridad, halin sa eanas ro daywa kon sa siin nag-inuman ro mga raya kaibahan ro iba pa kat ginsampit it biktima ro suspek nga magsaot.
Apang, uwa naila si Sarabia rason nga anang gintueop si Peñaflor kon sa siin hana kunta raya nga magbaeos apang gin-unahan it pagbuno it suspek nga nagresulta sa pag-angkon it lastro sa dughan ag butkon.
Bangud kara, gilayon man nga gindaea sa pinakamaeapit nga baeay paboengan ro biktima samtang ro suspek hay naaresto man matapos ro pilang oras nga pagtugis it pulisya.
Ro insidente hay padayon pang ginaimbestigahan it Balete Police Station para sa nagakaigong disposisyon.
