Kalibo Aklan ———–Boluntaryo nga nagsurender sa Kalibo Police Station ro sangka eaeaki nga nag-ako nga imaw ro responsable sa stabbing incident nga nag-eontad sa Purok 4, C. Laserna St. Kalibo bandang alas-7:15 kabie.
Base sa report, ginkilaea ro suspek nga si Lorenzo Abiertas, 33-anyos ag residente it nasambit nga lugar.
Sa inisyal nga imbestigasyon it Kalibo PNP, bandang alas-8:00 kabie kat nag-adto sa andang taeatapan ro suspek kon sa siin nagpanugiron raya nga nabun-an kara ro biktima nga ginkilaeang si Christy Parce, 47-anyos it Purok 5 sa nasambit man nga lugar.
Bangud kara, insigidang ginfollow up it pulisya ro insidente kon sa siin dikara nasayuran nga nagaagi eamang ro biktima sa iskinita kat may nagpatunga kanda nga diskusyon it suspek.
Matapos sigon ro diskusyon hay nag-uli ro suspek apang ro biktima hay nagdiretso sa baraka agud nga magbakae it pagkaon.
Dikara eon sigon nagbalik ro suspek ag nagpang-abot sanda nga ko ulihi hay ginbuno ni Abiertas si Parce nga nag-angkon it lastro sa waea nga porsyon it anang tiyan.
Si Parce hay gilayon man nga nadaea sa aklan provincial hospital kon sa siin imaw sa makaron ginaeapatan it nagakaigong pagbueong.
Samtang si Abiertas hay nakakulong eon sa Kalibo Police Station para sa nagakaigong disposisyon.
