KALIBO, Aklan — Matapos ro pagpatay sa sangka 30-anyos nga eaeaki sa Sitio Banluk, Brgy. Rosario, Malinao, gabi-i it Biyernes, Hunyo 28, nagapanawagan ro live-in partner sa responsable sa krimen nga magsurender eon sa mga awtoridad.
Suno kay Nina Riza Clair Iremedio, live-in partner it biktimang si Jeffrey Isuga, sangka laborer ag residente it Brgy. Cabayugan, Malinao nga dapat eon nga magguwa ag magsurender ro owa pa nakilaea nga suspek agud nga mataw-an ro hustisya ro pagkamatay it anang partner.
Ginpahayag nga natabu ro insidente samtang naga-eaha it andang pang-ihapon ro biktima sa kilid it ginapa-ugdok nga baeay it pamilya Iremedio kat gulping may nabatian nga daywang magkasunod nga eupok it baril.
Nagsinggit pa sigon ro biktima nga magku-ob ro tanan, apang nakita eon lang nanda nga natumba ag owa eon nakabangon ro anang live-in partner.
Nakaangkon sigon raya it tama it bala sa anang waea nga kili-kili kun sa siin mabaskog ro pag-ilig it dugo.
Owa sigon nanda nakita ag nakilaea ro suspek bangud nga masyadong madueom ro lugar nga anang ginpanaguan.
Ginkabuligan raya nga ginsakay sa motorsiklo ag gindaea sa ospital apang gindeklarang dead on arrival.
Gin-insister pa ni Iremedio nga umpisa nga nag-iba sanda it anang live-in partner may an-um nga buean eon ro nagtaliwan hay owa imaw it nasayuran nga naging kaaway kara bangud nga mabuot raya nga klase it tawo ag mabinuligon.
Nasubuan man imaw bangud nga maabu pa kunta ro andang plano nga daywa.
Nagapadayun pa ro imbestigasyon it Malinao Municipal Police Station sa insidente kamana man ro pagtumod sa pagkatawo ag motibo it suspek.
Sa pihak nga parte, ginpahayag ni Punong Barangay Yolanda Salem it Rosario, Malinao nga antes nga nagpatindog it baeay ro pamilyang tinapikan it biktima hay nag-dangop ro mga raya sa barangay bangud nga ro eugta nga ginapatindugan it andang baeay hay komon pa.
Apang, ginklaru nana nga owa it kahilabtanan kara ro biktima ag owa man it isyu sa pagpatindog nanda it baeay.
Samtang, blangko man sigon sanda sa motibo it krimen kamana man nga owa nanda nakilaea ro biktima .
