KALIBO, Aklan—Nagpanindugan ro sangka eaeaki nga self defense ukon gindepensahan eamang nana ro anang kaugalingon sa gin-obra nga pagpamaeag it anang kainuman nga pagapatyon ro anang bilog nga pamilya pasado alas-10:00 kabi-i sa Sitio Bota, Barangay Cortes, Balete.
Suno kay Francis Dominguez samtang sa katung-anan it selebrasyon sa pag-graduate it anang unga hay gulping nag-abot ro biktimang si Junito Cuadrante ag nakipag-inuman kanda.
Kat nag-uli eon ro mga kainuman, nag-ea-ong man ro biktima, apang pagkapanaog sa hagdan hay gulpi sigon raya nga nagsinggitan nga pagapatyon ro bilog nga pamilya it suspek samtang may ginabuytan nga sanduko.
Bangud kara, gulping gin-agaw ni Dominguez ro sanduko halin kay Cuadrante kun sa siin nag abot pa sa punto nga nagdueumugan sanda hasta nga naagaw nana ro sanduko ag gin-eabu it haeos napueong beses sa biktima nga gintunaan it anang kamatayon.
Nagpangdueum sigon ro anang panan-awan rason nga nahimo ro krimen.
Maskin suno kana imaw hay nangawa bangud nga owa man it diskusyon nga nagpatunga kanda antes ro insidente.
Samtang, aminado si Dominguez nga nakaangkon eon sanda it dating alitan it biktima matapos nga gina-alegar nga ginhana nana nga eab-on ro anang unga nga maswerteng owa natamaan bangud nga nakapanaw ro motorsiklo nga ginasakyan kara.
Matapos ro krimen hay nahimo pa nga mag-ilis it suspek it anang duguan nga eambong ag boluntaryong nagsurender sa otoridad.
Haum sigon imaw nga atubangon ro anuman nga kaso nga igapasaka kontra kana.
