KALIBO, Aklan—Padayun nga gina-obserbahan sa Aklan provincial hospital ro kahimtangan it sangka 60-anyos nga lolo matapos nga eab-on it anang naka-away bandang alas-7:30 kaina it agahon sa boundary it Barangay Ochando ag Dumaguit sa banwa it New Washington.
Nag-angkon it igo it pag-eabu sa anang leog, itsura ag alima ro biktimang si Carlito Blanco alyas Loloy, residente it Brgy. Ochando samtang ro suspek hay si Elmer Talas, 44 anyos it Brgy. Dumaguit sa nasambit nga banwa.
Matapos ro insidente hay boluntaryong nagsurender ro suspek.
Base sa report, nag-ugat ro owa pagka-ilintindihan it daywa matapos nga gina-alegar nga ginsita it biktima ro suspek bangud sa masangag nga tambutso it anang motorsiklo.
Ginasugid nga nagapa-uli eon kunta kaina it agahon si Talas halin sa namatyan kat gin-abangan it biktima ag ginkompronta sa pirmeng pag-agi sa lugar.
Bangud nga owa pa naumpawan ro suspek sa anang kahilungon, ginpatulan kara ro biktima ag nakaangkon it pagbaeaywan.
Pagkatapos it insidente hay nag-uli ro suspek apang uman nga nagbalik nga may bitbit eon nga sanduko ag gin-eabu it makapilang beses ro biktima.
Insigidang gindaea ro biktima sa ospital it mga rumespondeng rescue team it MDRRMO New Washington.
Depensa man it suspek nga bukon eamang it imaw ro naga-agi sa lugar nga may masangag nga muffler ro motorsiklo.
Haum sigon imaw nga atubangon ro anuman nga kasong igapasaka kontra kana.
