KALIBO, Aklan—Posibleng magapangatubang sa kasong frustrated homicide ro suspek nga si Juvy Igma nga imaw ro ginaturo nga responsable sa pagbaril sa biktimang si Reynante Mongaya, 52-anyos, sangka photographer ag residente it Purok 13, C Laserna St. Brgy. Poblacion, Kalibo.
Suno kay P/Lt. Aubrey Ayon, deputy chief of police for operation it Kalibo municipal police station nga boluntaryong nagsurender sa sangka kagawad sa Brgy. Kinalangay Nuevo, Malinao ro suspek kon siin idto eon nanda raya nabueo sa ginkasa nga manhunt operation.
Sa pagpangusisa it mga otoridad kay Igma, ginturo nana ro baril nga ginamit kon siin narekober it pulisya ro kalibre 9mm nga may sueod pang tatlong ka bala sa magazine maeapit sa andang residensya.
Ginpahayag dugang ni P/Lt. Ayon nga ginaberipika pa nanda makaron kon sin-o ro nagapanag-iya it nasambit nga armas kon may lisensya raya bangud nga uwa it ginapakitang dokumento ro suspek.
Ro daywa suno kay Ayon hay may record eon sa andang taeatapan sa mga naunang banggianay it mga raya hasta nga kaina it agahon hay umabot sa punto nga nagbais sanda bangud sa baeas ag nabarilan ni Igma si Mongaya nga una eon man sa stable nga kondisyon sa sangka pribadong ospital sa banwa it Kalibo.
