Kalibo Aklan——-Padayun nga nagapanindugan si Rannie Vicente, 35 anyos it Brgy. Dongon East, Numancia nga owa imaw it kahilabtanan sa pagbaril-patay sa 22 anyos nga daeaga nga si Nadynne Faith Medina ko biyernes it gabi-i samtang nga nagapasueod sa eskenita pauli sa andang baeay sa Brgy. Andagao Kalibo kaibahan ro anang ina ag manghud nga babaye .
Sa interview it Bombo Radyo, ginpahayag it suspek nga may kaibahan imaw nga magapamatuod nga ko Biyernes it gabi-i kat natabu ro krimen hay idtu sanda sa banwa it Ibajay sa baeay it anang amo nag-overnight bangud nga pagka-aga it Sabado hay nagpanaw sanda kaibahan ro anang waeo nga tawuhan paagto sa Sitio Tabon sa Barangay Caticlan agud nga magkurae sa eugta it anang amo nga owa nana ginpangaeanan, kun sa siin, natapos ro andang trabaho ko Domingo ag naka-uli imaw sa andang baeay hay ko Lunes eon it hapon .
Ko Biyernes it udtro adlaw sigon hay nag agto imaw sa Brgy. Bulabud, Malinao agud nga magbo-oe it mga tawuhan .
Gindugang pa kara nga masakit para kana nga imaw ro ginaturo nga may kahimuan sa krimen.
Makabig suno kana nga mistaken identity ro pag-aresto kana .
Samtang, aminado si Vicente nga imaw ro nagapanag-iya sa daywang baril nga ginaeakipan it kalibre 45 nga may magazine ag 38 kalibre nga revolver sa paghaeughog sa sueod it anang baeay pasado alas-5 it hapon nga puro owa it nagakaigo nga lisensiya .
May armas sigon imaw bilang self defense bangud sa mga paeag sa anang kabuhi bangud sa nature it anang trabaho .
Ginpamalibaran man nana nga kakilaea nana ro pamilya Medina partikular ro biktimang si Nadia .
Kadungan kara, nagpanawan imaw nga magsurender eon ro matuod nga suspek agud nga malimpyuhan eon ro anang pangaean.
Narekober man sa operasyon ro motorsiklo nga ginapatihan nga gingamit sa krimen .
Ro suspek hay ginpaidaeum sa paraffin test kamana man ro mga narekober nga armas hay igapaidaeum sa ballistic examination.
Samtang, ginklaru ni Vicente nga naklaru eon ro anang pangaean sa pagkaeakot kara sa pagpatay sa dating barangay chairman it Capataga, Malinao.
