Arestado ro ginaturo nga suspek sa pagbaril-patay sa sangka empleyado it banko matapos ro haeos magadaywang dag-on eon nga pagpanago kara.
Ginpahayag ni PCapt. Maricel Guevarra it Numancia Municipal Police Station nga pinaagi sa gahum it warrant of arrest nga ginpirmahan ag ginpaguwa ni Hon. Joebel Barrera Delmoro, Presiding Judge, Branch 2, Regional Trial Court, 6th Judicial Region, Kalibo nga may Criminal Case No.16281 hay gin-aresto ro suspek nga si Bernie Tipay, 42-anyos ag residente it Brgy. Navitas, Numancia.
Ginpahayag dugang ni PCapt. Guevarra nga ro tanan nga natipon nga ebidensya ag sandig sa witness hay nagaturo kay Tipay nga imaw ro responsable sa pagbaril-patay sa biktimang si Jhonalyn Maribojo ko dag-on 2021 samtang nakasakay sa traysikel pasueod sa anang trabaho
Si Tipay hay ginakabig bilang Top 1 Most Wanted Person sa Numancia, Top 10 sa bilog nga probinsya it Aklan ag Top 8 sa Region VI.
