KALIBO, Aklan—Ginpaidaeum makaron nga adlaw it biyernes it Banga Municipal Police Station sa inquest proceedings sa kasong homicide ro 57 anyos nga suspek sa pagbuno sa daywang kaeaeakin-an nga ginkamatay it sambilog sa Brgy. Tabayon, Banga kabi-i.
Sa interview it Bombo Radyo Kalibo, ginpahayag it suspek nga si Rafael Dionisio it nasambit nga lugar nga nagpangdueum ro anang panan-awan rason nga nahimo ro krimen.
Gindugang pa kara nga self-defense eamang ro anang gin-obra matapos nga gina-alegar nga eambangan ag ginhaboy it bato it biktimang si JR Concepcion, 35 anyos.
Nauna kara, samtang naga-inuman ro biktima ag suspek kaibahan si Valentino Dionisio, 54-anyos ag first cousin ni Rafael, kat maistoryahan ro kasong physical injury nga ginpasaka it biktima kontra sa unga it suspek nga presenteng ginapamatian sa korte.
Ginsuhestiyon sigon ni JR kay Rafael nga taw-an imaw it 500 pesos kabaylo it indi pagtambong sa andang ikatlong hearing.
Bangud nga owa it kwarta hay gin-aywan it daywa ro suspek ag nagtabok sa pihak nga karsada agud nga idtu padayunon ro inuman.
Samtang nagapauli hay nag-agi ro suspek sa prente it mga biktima apang gina-alegar nga gin-eambangan ag ginhaboy it bato rason nga nagbaeos imaw pinaagi sa pagbuno sa mga raya gamit ro anang daea nga siyaw-duko.
Nagpaeagyo ro suspek matapos ro insidente apang ko ulihi hay nagsurender man sa kapulisan sa bulig it andang barangay official .
