Ginakabig nga armed and dangerous person it Nabas Municipal Police Station ro suspek sa natabo nga pagpamaril sa Sitio Agutay Brgy. Aquino sa banwa it Ibajay kahapon.
Sa gintingob nga pwersa it Nabas ag Ibajay Municipal Police Station, nagapadayon makaron ro ginapatigayon nga hot pursuit operation sa suspek nga si Cristobal Obrique 24-anyos ag residente it Brgy. Pinatuad sa banwa it Nabas matapos nga barilon kahapon ro sangka pampasaherong bus sa nasambit nga lugar.
Base sa inisyal nga imbestigasyon it Nabas-PNP nakit-an ro suspek sa temporaryo karang ginatiniran sa may Brgy. Libertad, Nabas bandang alas-5:25 kahapon ag ginapasurender eon kungta apang gulpi eamang rayang nagpaeupok it baril ag insigidang nag paeagyiw.
Ginapatihan nga may posibilidad nga nagapanago makaron ro suspek sa kabukiran nga sakop it banwa it Nabas.
Suno pa sa katapo it mga kapulisan, dati eon nga naka-eksperyensya it mental disorder ro suspek.
Sa pihak nga parte, nagapaandam man ro mga otoridad sa publiko nga magdahan ag kung sin-o man ro makasapupo sa suspek hay kun mahimo makipag-angot lang sa Nabas ag Ibajay PNP station.
