KALIBO, Aklan–Nakataeana nga iga-inquest makaron nga adlaw sa Aklan Prosecutor’s Office ro suspek sa natabo nga pagpang-eabo ko Mayo 29 sa bahin it Brgy. Afga, Tangalan.
Suno kay Police Master Sergeant Peryl Antaran it Tangan Municipal Police Station nga samtang naga-ihapon ro biktima nga si Joel Corpus, 53-anyos hay gulping nag-abot ro suspek ag mismong bayaw kara nga si Bobby Lorenzo, 46-anyos nga una sa idaeom it makahieilong nga ilimnon ag armado it talibong.
Ginasugid nga nagapinggitan ro suspek sa guwa it panimaeay ag ginapagguwa ro biktima.
Nakaangkon sigon it komusyon sa tunga it magtimbang nga parte hasta nga maeab-an ro biktima ag nakaangkon it lastro sa waea nga parte it anang kilid.
Gintinguhaan pa nga madaea sa Aklan Provincial Hospital ro biktima apang namatay man samtang ginabueong.
Samtang, ro suspek hay insigidang nadakpan sa bahin it Brgy. Dumatad, Tangalan kasunod it ginpatigayun nga hot pursuit operation it mga kapulisan.
Nasayuran nga sangkiri nga away sa pananom ag kasapatan ro gin-ugatan it insidente.
