KALIBO, Aklan–Nagapanawagan makaron ro pamilya Ruiz sa sin-o man nga makatao it impormasyon angot sa pagkakilaeanhan it suspek nga nagpang-snatch it cellphone it andang igmanghod nga estudyante sa sangka pribadong eskwelahan sa banwa it Kalibo ko nagtaliwan nga adlaw.
Suno kay Maila Ruiz, magueang it biktima nga hasta makaron hay indi pa haeos maka-istorya ro anang manghod bangud sa kakueba ag trauma tuga it insidente.
Ginapahayag nga samtang nagapabalik sa eskwelahan matapos nga mag-ilabas ro anang manghod kaibahan ro daywa pa kara nga classmate hay may sangka eaeaki nga gulping naghabnit sa anang buyot nga daywang ka mga cellphone.
Ginpabuytan eamang sigon it anang classmate sa biktima ro cellphone bangud nagakaon pa raya it mais kung siin owa sanda nagaeaum nga may magka-interes nga magbuoe kara.
Nabugto pa sigon ro earphone it bikima matapos raya nga makipag-agawan sa suspek.
Matapos nga magka-atubang sanda it suspek hay insigidang nagdaeagan pabalik it eskwelahan ro biktima kaibahan ro anang mga classmate bangud sa kakueba.
Nasayuran nga naga-isaeahanon eamang nga nagatikang ro suspek sa lugar nga may buyot nga helmet.
Ro insidente hay insigida man nga ginpa-blotter sa Kalibo Municipal Police Station para sa nagakaigo nga disposisyon.
Angot kara, nagtanyag man si Mayor Juris Bautista Sucro it P10,000 nga padya sa sin-o man nga makaturo sa suspek.
Ro insidente hay nabue-an it CCTV footage nga posibleng makabulig sa madasig nga pagtumod sa ginakahimtangan it nasambit nga suspek.
