Kalibo Aklan —–Ginreklamo it 34-anyos nga suspek sa pagpanghimueos sa an-om nga dag-on nga ungang babaye sa banwa it Balete ro pagpanakit sigon kana it mga pulis sa sueod it lock-up cell it Balete Police Station.
Suno kana, ginsabyahan imaw it tubi nga may ice, ginpatuburan it tubi sa gripo, gintimbanan ag gingisi pa ro anang eambong bilang kaparte sigon it interogasyon kana.
Ginreklamo dugang nga gabi-e raya ginahimo it daywang ka pulis nga ginakaeakipan it sangka babaye ag sangka eaeaki rason nga uwa it makit-an nga ebidensya sa cctv nga presenteng una sa sueod it taeatapan.
Ginpahayag dugang nga uwa naka-uniform ro mga naga-interogate kana apang kilaea nana ro mga raya sa hitsura.
Samtang sa pihak nga parte, hugot nga ginpamalibaran ni Police Major Jake Barila, hepe it Balete PNP ro alegasyon it nasambitang suspek.
Suno kana, uwa it pagpanakit nga nagakatabo sa sueod it anang hurisdiksyon.
Sa kamatuoran sigon kat ginpaidaeom nanda raya sa medical examination antes nga ginsueod sa locked up cell hay nakitaan imaw it gasgas apang uwa raya natabo sa sueod it police station.
Ginpahayag dugang nga uwa ginatolerar sa linyada it pulisya ro nagapanakit ag uwa sanda it kinamatarong nga sakiton ro sangka indibidwal maskin man-uno pa kabug-at ro anang kasae-anan.
