Kalibo Aklan —- Posible nga abuton pa hasta sa buean it Agosto ro cancellation it klase sa nasyon nga Finland.
Raya hay suno kay Bombo International Correspondent Rose Leminen sa interview it Bombo Radyo.
Maskin uwa sigon naka-lockdown ro andang syudad nga Ita-Suomen Laani hay nagsarado ro mga restaurants, malls, shops ag iba pang tourist destination bilang pagsunod eon man sa gobyerno agud nga inde eon magkalhit ro sakit nga 2019 coronavirus disease (COVID-19) pandemic.
Ginpahayag dugang nga naga-istar sanda sa sangka village ag sangkiri ro andang populasyon kon sa siin raya ro ginatan-aw nga rason kon ham-an it sangkiri eamang ro nailista nga kaso sa andang lugar.
Haeos tanan suno kay Limenen hay nagasunod sa sueondanan it gobyerno kaparehas eon lang sa social distancing bangud haeos tanan hay nahadlok man tamaan it sakit.
Ro mga maeagko nga syudad suno kana hay inde malikawan nga magtinaas ro andang kaso bangud sa local transmission nga ginatawag.
Sambilog sa stratehiya nga ginhimo it gobyerno hay ro mga COVID patient hay uwa ginpasudla sa ospital kundi ginpauli ro mga raya sa tagsa nanda ka panimaeay ag ro mismong mga doctors ag nurses ro naga-adto kanda agud nga sanda hay boengon.
Ginhimo nga isolation facility ro andang mga baeay ag adlaw-adlaw hay nagatravel ro mga frontliners para adtunan ro andang mga pasyente.
Hugot suno kana nga ginapatuman it gobyerno ro stay at home policy ag ro home quarantine eabi eon sa mga magueang nga sanda ro vulnerable sa nasambitang sakit.
