Gulpiyada nga nagpatuman it suspensyon sa pagpasueod it mga bag-ong overseas filipino workers ukon OFW ro nasyong Kuwait.
Raya hay matapos nga gin-anunsiyo it Kuwaiti government ro suspensyon it new entry visa sa mga Pilipino.
Suno kay Bombo International Correspondent Dennis Rata it Kuwait, may mga gin-eabag sigon nga probisyon ro gobyerno it Pilipinas sa 2018 bilateral labor agreement (BLA) sa Kuwait.
Bangud sa gintukod it gobyerno it Pilipinas nga shelter para sa mga distress OFW ukon ro mga nagtakas maghalin sa andang mga Kuwaiti employer ro sambilog sa mga naging rason it entry ban.
Apang, nasayuran nga ro pagtukod it shelters para sa mga ginmaltratong OFWs hay ginpasugtan sa idaeom it kasugtanan sa tunga it Pilipinas ag Kuwait.
Ginpahayag dugang ni Rata nga sa pihak it nasambit nga suspensyon hay nagapabilin nga maayos ro andang kahimtangan antes pa man ro pagpatuman it entry ban.
Ginduea man kara ro pagkabaeaka it andang mga pamilya nga basi sanda hay naapektohan sa naging desisyon it Kuwaiti government.
Sa pihak nga parte , ro delegasyon it Pilipinas nga ginabilog it opisyal it gobyerno hay magaadto sa Kuwait sa masunod nga Dominggo para klaruhon ro nasambit nga isyu.
