Uman nga nabutang sa aeang-aeang nga sitwasyon ro Bureau of Corrections (BuCor) bangud sa ginasugid nga makadueudang kamatayon it pilang inmates sa New Bilibid Prison (NBP).
Raya makaron ro ginapatutukan it bag-ong sekretaryo it Department of Justice Jesus “Crispin” Remulla.
Partikular kara ro pagkamatay it mga high profile nga presu nga ginasugid nga puro tinamaan it COVID.
Kan-o eamang hay nagpasaka it kasong murder ro National Bureau of Investigation (NBI) sa kapin sa 22 nga mga doktor ag tawuhan it National Capital Region Office (NCRPO) it PNP.
Makontrobersiyal ro natukiban it NBI sa ginpatigayon nga pagkamatay it pilang inmates.
Raya hay nag umpisa ko 2020 sa kasagsagan it pandemic it COVID -19 sa nasyon kat gin-report it Bureau of Corrections ro pagkamatay it kapin sa 22 nga presu kaibahan ro siyam nga high-profile convicts kaibahan si Jayvee Sebastian.
Si Sebastian ro nagtestigo kay dating Sen. Leila de Lima nga ginaeakot sa ilegal nga droga.
Sa pag-usisa, ginasugid nga maabu nga buho ro nakita it NBI.
Maabu nga discrepancy sa report it pulisya.
Kaibahan eon kara ro ginasugid nga pagsaylo sa waeo nga high profile inmates ag ko ulihi hay namatay sa ginasugid nga isolation room.
Ro waeo hay sentensiyado sa kaso it droga.
Owa sigon it nakita nga anuman nga sintomas it COVID sa mga namatay.
Apang wait eang, dapat man nga mabatian ro parte it BuCor nga nagpanindugan nga owa nanda gingamit nga cover-up ro COVID-19 sa insidente it pagkamatay it mga preso.
Makabig raya nga mabug-at nga pasibangud nga dapat nga mataw-an it maid-id nga pag-usisa.
Masarangan sigon nga pamatud-an it BuCor nga bangud sa virus it COVID ro rason it kamatayon it mga nasambit nga mga presu.
Magahueat kita sa magiging resulta it mas madaeum pang imbestigasyon angot kara.
