KALIBO, Aklan—Kadungan sa ginpatigayon nga simulation exercises it Civil Aviation Authority of the Philippines ukon CAAP Aklan sa Kalibo International Airport, sangka sweeper flight halin sa Mactan, Cebu nga may sakay nga limang ka pasahero ro naghugpa sa nasambit nga paeoparan.
Suno kay CAAP Aklan manager Engr. Eusebio Monserate Jr., ro pribadong aircraft hay may sakay nga ap-at ka adults ag sangka onga.
Gin-insister it opisyal nga may approval it central office ro sweeper flights nga ginbaton nanda sa KIA kon sa siin ro mga pasahero nga puro pinoy hay ginsueang it ambulansya it sangka banwa sa Aklan.
Ginpaathag ni Engr. Monserate nga antes aprubahan ro sangka sweeper flights hay kinahang-ean nga makasikyar it nagakaigong dokumento ro mga pasahero partikular ro health certificate ag travel authority clearance.
Ginklaro man kara nga uwa pa it byahe ro mga eroplano sa KIA apang sa oras nga magbalik-operasyon ro paeoparan hay ginpasiguro nana nga haom eon sanda sa pagbaton it mga byahero.
Nasayuran nga naging madinaeag-on ro ikaywang simulation drill bilang pagpahaom sa new normal system nga ginpasakupan it 152 katawo.
