KALIBO, Aklan–Uman nga ginbuksan sa publiko ro Governor Corazon L. Cabagnot Tourism & Training Center Swimming Pool kon siin ro ginpatigayon nga re-opening ag blessing hay ginpangunahan nanday Dr. Michael Terencio PGDH- EEDD ag Palmi Fernandez, Officer- In- Charge – EEDD – RHO.
Sa naging diskurso ni Dr. Terencio, ro nasambit nga pasilidad hay nagpahuway it pilang buean agud nga taw-an it daean ro rehabilitation sa swimming kon siin nasamad ro filtration.
Ro Aklan training center hay naging venue it mga public ag private event kon siin ko mga nagtaliwan nga dinag-on hay gindagsa raya it maabong tawo rason nga bumigay ro filtration swimming pool ag ginkinahang-ean nga temporaryong isarado sa publiko para maayos.
Makaron suno kana nga ginbuksan it uman sa publiko ro pasildad hay ginpasiguro nana nga pagadumaeahan raya it maayos para maibalik ro dati nga kaanyag ag sigla sa sueod it pasilidad.
Naging kaparte man sa nasambit nga programa sanday Jetty Port Administrator Esel Flores, Human Resource Officer Methusellah Sta. Maria, ag Dr. Vic Sta Maria kamana man si Kalibo Mayor Juris Sucro nga nagpaabot it anang mensahe it kalipay sa uman nga pagbukas kara sa publiko.
Madumduman nga ro kaparte it nasambit nga pasilidad hay nauna eon nga ginamit bilang quarantine facility ukon Ligtas Covid 19 Center sa kasagsagan it pandemya.
