KALIBO, Aklan—Sa unang kahigayunan sa sueod it 44 anyos halin kat gin-umpisahan ro sikat nga Sydney fireworks display, ginsarado it gobyerno ro Sydney Harbour Bridge ag ro iconic Sydney Opera House agud nga inde pagdagsaon it milyon katawo nga gustong makit-an it maeapitan ro magarbong fireworks display sa pagsug-aeaw it bag-on dag-on.
Suno kay Bombo International Correspondent Denmark Suede it Sydney, Australia, ro tikang it gobyerno hay kasunod sa nagapadayon nga pagpanaeasa it coronavirus disease ukon Covid-19 kon sa siin ko nagtaliwan nga dominggo hay nakaangkon it 170 ka locally acquired Covid-19 case ro nasambit nga nasyon.
Makasueod ka eamang sa nasambit nga lugar kon may mga hotel ukon restaurants booking ka kamana man sa andang floating nga bangka nga perfect kunta para sa site seeing it makolor ag bonggang fireworks display.
Tag-init makaron ro panyempo sa nasambit nga nasyon rason nga nakaugalian kunta it mga Australian nga magpadueong sa mga baybayon apang ginlimitahan eamang it gobyerno sa limang katawo ro gatherings rason nga ro mga nakasanayan nga aktibidad sa kada pagsug-aeaw it bag-ong dag-on hay tanan nabaliwala bangud sa pagpanaeasa it deadly virus.
Nasayuran nga ro Australian government ko nagtaliwan nga dag-on hay naggastos it kapin sa 6.5 milyon australian dollars para sa fireworks display nga gintambungan it kapin sa 1.6 milyon katawo ag nakit-an it kapin sa 1 bilyon people sa bilog nga nasyon.
