KALIBO, Aklan–Uman nga nagpatuman it mandatory nga pagsuksok it face mask sa Sydney, Australia.
Suno kay Bombo International Correspondent Denmark Suede it Sydney, Australia nga ro nasambitan nga pagsinueondan hay ginpatuman umpisa ko adlaw it Biyernes, Hunyo 18 matapos nga makalista it kaso it delta variant nga coronavirus disease 2019.
Matapos sigon ro daywang buean nga pagkahilway sa covid-19 hay uman nga nakalista it waeong ka mga kaso ro Sydney matapos nga sangka limosine driver nga nagamaneho it mga international flight crew paadto sa airport ro nakitaan nga infected it nasambitan nga sakit.
Raya man ro pinakaunang nailistang local transmission it nasambitan nga variant it covid-19 rason agud nga magpatuman ro gobyerno it mandatory nga pagsuksok it face mask sa hospital kamana man sa public transport.
Samtang, bukon man it apektado sa nasambitan nga polisiya ro mga estado nga owa it may nairecord nga kaso it delta variant nga covid-19.
