KALIBO, Aklan—Balak makaron it Kalibo Parish Church ro synchronize ukon doeueongan nga pagtukar it nagakasari-sari nga grupo o tribu it sangka kanta sa maabot nga Kalibo Sto. Nino Ati-Atihan Festival 2019 agud nga ipasakop sa world record.
Raya ro ginmitlang ni Fr. Jose Tudd Belandres, moderator it Parish Team Ministry sa anang paghathat it anang committee report sa Kalibo Sto. Ñino Ati-Atihan Festival Inc. (KASAFI) bilang kaparte it mga aktibidades it Simbahan.
Ginpahayag kara nga gin-istoryahan eon sigon it parokya nga pagkatapos it pagsinggit it “Viva kay Sr. Sto. Niño” hay masunod ro doeueongan nga pagtukar sa prenti it Kalibo Cathedral, Domingo it agahon.
Gusto sigon it parokya nga patukaron it mga tribu, grupo ag mga caro owners ro sikat anay nga kanta nga “Happy Days are Here Again”.
Paga-imbitahan sigon nanda ro Guinness Book World of Record agud nga mag-obserbar para sa may pinakamaabo ag doeueongan nga nagakatukar it nasambitan nga kanta.
Ginpahayag dugang ni Fr. Belandres nga mas mayad sigon raya kaysa sa eain-eain ro ginatukar nga kung sa siin imbes nga maka-kriar it musika hay nagiging sangag eon lang.
