Ginaeauman nga magapadayun ro sunod-sunod nga pagtaas sa presyo it produktong petrolyo sa masunod nga domingo bangud sa naga-grabeng tensyon sa ibang nasyon ag mabaskog nga demand sa merkado.
Sa ginpaguwa nga abiso, adlaw it Biyernes, ginpahayag ni Jetti Petroleum president Leo Bellas nga posibleng madugangan it uman ro presyo it diesel it 50 sentimos hasta 70 sentimos kada litro.
Samtang, mas mabug-at ro ginaeauman nga dugang sa gasolina nga posibleng mag-abot sa ₱1.40 hasta sa ₱1.60 kada litro.
Sa oras nga ipatuman raya sa Pebrero 17, raya eon ro ika-an-um nga sunod nga domingo nga pagtaas sa presyo it gasolina samtang ro produktong diesel hay posibleng umabot sa ikawaeong sunod nga pagtaas it presyo.
Suno kay Bellas, nagapabilin nga mataas ag pabag-o-bag-o ro presyo it langis sa world market bangud sa paeag nga giyera sa tunga it United States ag Iran.
Dugang pa kara ro mga ginapatong nga penalidad ag taripa kontra sa mga nasyong nagabakae it produktong langis halin sa Iran nga mas pang nagapataas sa presyo.
Ginpunto pa nga ro ginaeauman nga pagtaas it gasolina hay tuga it mabaskog nga pagbaligya sa rehiyon ag nagataas nga demand kadungan it nagahilapit nga selebrasyon it Lunar New Year.
