KALIBO, Aklan—Gin-lockdown anay umpisa ko Lunes nga adlaw ro taeatapan it Provincial Health Office ag animal bite center sa sueod it Aklan provincial hospital matapos nga pilang empleyado nanda ro nagpositibo sa coronavirus disease 2019 (COVID-19).
Napueo nga empleyado suno kana it PHO ag daywang high risk contacts hay ginpaidaeum sa swab test, kun sa siin lima kanda ro nakaangkon it virus ag negatibo man ro daywa halin sa animal bite center.
Suno kay Dr. Cornelio Cuatchon Jr. nga sangka empleyado nanda ro unang nagpositibo sa sakit.
Ginpaidaeum raya sa swab test matapos nga mag-eain ro anang pamatyag.
Sa ginpaguwa nga resulta, nagpositibo raya sa virus rason nga gin-covid tests man ro anang mga nakasalamuha sa opisina ag natukiban nga lima ro nagpositibo.
Ginpahayag ni Dr. Cuatchon nga agud nga masiguro ro kaeowasan it mga empleyado, temporaryong ginpapundo ro operasyon it andang opisina para sa disinfection.
Tanan sigon nga surveillance team it PHO hay naka-isolate makaron kaibahan eon imaw ag ginboe-an it swab specimen sample ag nagahueat eon lang it resulta halin sa molecular laboratory.
Kaabuan sigon sa andang mga empleyado hay naka work from home.
