KALIBO, Aklan–Pagkatapos ku asosasyon it mga senior citizens sa banwa it kalibo, ro mga taeatapan man it mga persons with disabilities ukon PWDs ro ginpanupuran it mga laptop ag printers it lokal nga gobyerno it Kalibo.
Ginpatigayon ro distribution ko Pebrero 17 sa munisipyo nga ginpangunahan ni Mayor Juris Sucro kaibahan ro iba pang lokal nga opisyal sa nasambit nga banwa.
Raya hay nataw-an it katumanan matapos aprubahan it Sangguniang Bayan ro gindihon nga resolution ni SB member Augusto Tolentino.
Suno kay SB Tolentino nga raya hay sandig sigon sa RA 7277 ukon magna carta for person with disability.
Nasayuran nga 16 nga PWD barangay association ro nakapanipueos it nasambit nga kagamitan.
Mabahoe sigon raya nga bulig agud nga indi eon maggastos halin sa kaugalingon nga boesa ro mga PWDs sa mga kinahangeanon nanda nga igapa-print eabi eon ro mga ginapanupod nga pamphlets sa andang mga miyembro.
Apela man it opisyal nga dahanan ro nasambit nga mga equipment.
Nasayuran nga makaangkon man it practical computer training ag orientation ro kada presidente it asosasyon agud nga masayuran ro paggamit kara.
Ro pondo sa pagbakae it laptop ag printers hay naghalin sa budget it banwa nga nakataeana para sa mga PWDs.
