KALIBO, Aklan—Nagaeaum si Lt. Col. Don Dicksie De Dios, hepe it Malay Police Station nga magaserbi nga paandam sa iba pa ro andang pagpasaka it kaso sa mga nagapanag-iya it ap-at nga bar and restaurants sa isla it Boracay nga nag-eabag sa Inter-Agency Task Force (IATF) omnibus guidelines.
Ginaturo nga ro nasambit nga mga establisimento ro ginhalinan it ginasugid nga ‘superspreader’ nga party sa pihak it ginapatuman nga community quarantine.
Nagapangatubang ro mga negosyante nga owa anay ginpangaeanan sa kasong pageabag sa Mandatory Reporting of Notifiable Diseases and Health Events of Public Health Concern Act ukon Republic Act 11332.
Suno kay Lt. Col. De Dios, ginpasaka nanda ro reklamo sa Provincial Prosecutor’s Office kato pang Abril 15.
Nasayuran nga ko Marso 10, 2021 may sangka turista nga nagtambong sa party ag pagkatapos hay nag-bar hopping sa isla ag nagpositibo sa coronavirus disease (COVID-19) pagbalik it Manila.
Nakasalamuha kara ro maabung tawo rason nga nakaangkon it pagtaeapnan.
Ginasugid nga matapos nga mag negatibo sa RT PCR test para sa anang pagbiyahe sa isla hay nagwarang pa raya rason nga nakaangkon it exposure sa covid 19 positive.
Bangud sa pagtaas it kaso it coronavirus sa isla, ko Abril 7 ginpaidaeum sa daywang domingo nga enhanced community quarantine ro Barangay Balabag samtang naka-surgical lockdown man ro Barangay Manocmanoc.
Sa makaron ro banwa it malay ag isla it Boracay hay nakalista it kabilugan nga 338 nga kaso it COVID-19.
Sa nasambit nga numero, 30 ro aktibong kaso matapos nga makalista it 6 nga bag-ong kumpirmadong kaso.
