BANGA, Aklan—Nagapati ro tagbaeay nga unang ginsapuean it mga estudyante agud nga magpangayo it bulig nga uwa it foul play ro pagkaeomos ni Jhuros Flores sa Aklan river nga sakop it Brgy. Polo, Banga.
Suno kay Alma De Queroz, nagapati sanda nga aksidente eamang ro natabo ag nagsala ro mga raya kat uwa nanda natabangan si Jhuros kat ginahunos eon it lilo paidaeom maskin nga gintinguhaan pa kunta nanda raya nga eowason.
Makit-an suno kana sa reaskyon it mga pamatan-on ro kahadlok ag koeba sa natabo bangud nga pila sa mga raya hay nagpang-eoya ag nagkaealipong.
Ginpahayag dugang it ginang nga insigidang nagpangayo it bulig ro mga estudyante pagkatabo it insidente kon sa siin gilayon man nga nakaresponde ro mga rescuers ag iba pang emergency personnel it Banga Municipal Disaster Risk Reduction Management Council ag maging ro PNP personnel it Banga Municipal Police Station hay insigidang nagpangusisa sa lugar.
Kato pa man sigon hay maabo eon nga naeomos sa nasambit nga suba ag halin pa man kato hay may mga istorya eon nga naga-istar nga taglugar sa suba sa mismong gin-eomsan it binatilyo.
Nasayuran nga maabong fake news ro nagguwa angot sa pagkaeomos ni Jhuros kon sa siin nagapagulo eamang raya sa kaisipan it pamilya ag maging sa presenteng sitwasyon.
