NEWS Analysis– Ginpasiguro ni Pangueong Ferdinand “Bongbong” Marcos Jr. sa mga Pilipino nga padayun nga magtinguha ro anang administrasyon agud nga masiguro nga owa eon it magutom nga Pilipino.
Raya ro pahayag it Pangueo sa selebrasyon it 56th founding anniversary it Davao del Sur kan-o eamang.
Sa anang diskurso, ro pagtau it pinakamayad nga serbisyo sa pumueuyung Pilipino ro anang pamaagi it pagpasaeamat sa andang gintau nga kumpiyansa kana ko 2022 elections.
Sa pagtutok it lokal nga gobyerno sa tanan nga aspeto it andang pang adlaw adlaw nga pagpangabuhi, ginpahayag ni Marcos nga makasalig ro mga pumueuyu sa pagsueong it mga local businesses, pagpamayad it pang adlaw adlaw nga transaksyon, ag mas mayad nga kalidad it pagpangabuhi.
Samtang, ro sambilog sa mga programa it gobyerno para mapahagan-hagan ro gutom ag kapigaduhon sa mga pamilyang may manabang ginakita hay ro “food stamp” program it Department of Social Welfare and Development (DSWD).
Sa unang en banc meeting it National Anti-Poverty Commission (NAPC) ko Hunyo 30, ginmandu man ni Marcos sa mga ahensya it gobyerno nga gamiton ro whole-of-government approach para suk-ean ro mabuhay eon nga problema it kapigaduhon sa nasyon.
Sa pihak kara, gin uman it pangueo ro anang panawagan para sa pagkaeasugot, ag ginhambae nga raya ro anang pinakamabahoe nga hangkat sa mga Pilipino.
Sa matuod eang, maabu pang ginpromisa ro Pangueo nga hasta sa makaron hay owa gihapon nataw-an it katumanan.
Kapareho eon lang it promisang P20 pesos nga bugas, sa baylo nga magbarato hay nagtaea-as ro mga baeak-eon.
Sa nasambit nga pahayag it pangueo, medyu ginabudol eon ro mga Pilipino.
Kabay nga bukon it puro promisa eang bangud nga nagasalig ro publiko sa manami nga pagbag-o it nasyon .
