KALIBO Aklan–Ginpaathag ni Atty. Axel Gonzales, sangka political analyst sa Aklan nga tama ro naging tikang it Sangguniang Panlalawigan nga ipaabot ro sentimyento it mga Aklanon angot sa uman nga pagbuhi it Boracay Island Development Authority ukon BIDA bill sa idaeom it government-owned and controlled-corporation ukon GOCC nga uwa it nagakaigong konsultasyon sa mga opisyales it probinsya.
Nagakadapat gidman nga inde magpasilabot ro ibang lugar bangud nga may kaugalingon kita nga LGU’s.
Makabig nga kawad-an it respeto sa leaders it Aklan ro ginhimo it mga kongresista maghalin sa Bicol rason nga naghimo it tikang ro SP ag sambilog eon kara ro pagdeklara sa mga kongresista bilang persona non grata sa probinsya.
Aminado si Atty. Gonzales nga may mga shortcomings gidman ro Aklan LGU’s bangud nga naging commercialize ro Boracay hasta nga gin-intrahan eon ni dating Pangueong Rodrigo Duterte ag ginpasarado sa sueod it an-om nga buean agud nga limpyuhan.
Inde masarangan it pondo it Aklan ro rehabilitasyon nga gustong himuon apang makapamayad kon ro budget nga halin sa national hay igaturn-over sa Aklan LGU’s.
Samtang sa pihak nga parte, makabig suno kay Atty. Gonzales nga miscommunication ro natabo sa magtimbang nga parte kon siin posible nga uwa kasayod si Aklan vice governor Reynaldo Quimpo nga binawi it mga Bicolanong kongresista ro andang hagna nga BIDA Bill GOCC rason nga umabot sa deklarasyon it persona non grata.
Bilang baeos hay gindeklara man it mga nasambit nga kongresista ro opisyales it Aklan nga persona non grata kon siin posible nga uwa man sanda nakasayod nga gilayon man nga ginbawi it mga raya ro andang deklarasyon pagkasayod nga ginwidraw ro nasambit nga hagna.
