Kalibo Aklan ————–Ginpasiguro ni Ibajay Mayor ag League of the Municipalities of the Philippines (LMP)- Aklan Chapter President Jo-en Miraflores nga hugot nga pagasundon it mga Local Government Unit ro tama nga proseso sa pag-eubong it mga nagakamatay bangud sa COVID-19 sa probinsiya.
Raya hay kasunod sa mando ni Aklan Governor Florencio Miraflores sa tanan nga mga Municipal Mayor nga magpahaom it lugar nga paga-eubongan it mga pasyenteng nagakamatay bangud sa COVID-19 matapos nga suspendihon it sangka crematorium facility sa Iloilo ro andang pagbatun it mga cadaver bangud sa punuan eun raya.
Dugang pa kara nga hugot man nga igapatuman ro nakabaehag sa Code Sanitation of the Philippines (Presidential Decrre No. 856) para sa pag-eubong it mga bangkay 12 oras pagkatapos nga mamatay ag hugot nga pagasundon ro protocol kapareho it pag-eubong sa 6 feet nga kadaeumon ag pagbutang it metal casket.
Nasayuran nga bukon eamang it Aklan ro ginpamalibaran it nasambitan nga crematorium facility bangud ro bilog nga Panay Island hay idto man nagadaea it bangkay it mga pasyenteng nagakamatay bangud sa COVID-19.
Samtang sa pihak nga parte, nakalista eun kabilugang 130 ka mga aktibong kaso it coronavirus disease (COVID-19) ro banwa it Ibajay.
Suno kay League of the Municipalities of the Philippines (LMP)- Aklan Chapter President ag Ibajay Mayor Jo-en Miraflores ro tanan nga mga pasyente hay presente eun nga naka-facility quarantine.
Dugang pa kara nga naka-isolate eun man ro tanan nga may close contact sa mga nagpositibo agud nga malikawan ro pagkalhit pa it deadly virus.
Samtang, aminado man si Miraflores nga gulpi eamang nga nagtaas ro kaso it covid-19 sa andang banwa bangud may residente sigon nga owa eagi nagsugid nga nakabatayag eun raya it sintomas rason nga nagtapon man sa maabo pang iba.
