KALIBO, Aklan —- Ginpasidunggan it Sangguniang Panlalawigan it Aklan ro sangka 45-anyos nga tampad nga tricycle driver nga nagbalik it bag nga naaywan it anang pasahero nga may sueod nga kwarta nga nagabalor it P400,000 nga nakataeana kunta nga ipanupod bilang 13th month pay sa mga empleyado it sangka construction company ko nagtaliwan nga dag-on sa banwa it Kalibo.
Sa gin-aprubahang resolusyon, ginasugid nga si German Nilo Nalangan, residente it Bulwang, Numancia, Aklan hay nagpakita it indi matawaran nga katamparan ag mayad nga kabubut-on matapos nga ibalik ro nasambit nga mabahoe nga kantidad it kwarta nga naaywan sa anang ginapasadang tricycle ko Disyembre 23, 2021.
Naka-abot sa provincial board ro daeayawon nga gin-obra ni Nalangan rason nga gintaw-an imaw it pagkilaea ag pagdayaw pinaagi sa pagtau it cash incentives, resolusyon it pagkilaea ag food assistance.
Sa anang mapig-od nga pamisaea, gin-engganyo nana ro mga kaparehong drivers nga maging tampad sa andang isigkatawo eabi eon sa pag-abot sa mga makarondaya nga bagay .
