Uman nga napuno it kasadya ag excitement ro mga kamarero ukon karo owners sa banwa it Kalibo matapos nga uman nga makapasakop sa maabot nga prusisyon kadungan it selebrasyon it Semana Santa.
Suno kay Kirby Villanueva , sambilog sa karo owner nga ko nagtaliwan nga dag-on hay pila eamang ro nagpasakop bangud sa mga restrictions nga ginapatuman tuga it COVID-19 pandemic.
Apang makaron nga dag-on hay ginpasugtan eon ro tanan nga mga kamarero nga magpasakop sa sambilog sa gina abangan nga religious event kada kuwaresma kun sa siin pila sa andang miyembro hay nagpasakop eon sa prusisyon ko domingo de ramos ukon palm sunday.
Sa makaron hay gina-amat-amatan eon nanda ro pag dekorar it andang natungdan nga mga karo para sa prusisyon sa Biyernes Santo.
Nasayuran nga ro pamilya Villanueva hay henerasyon eon nga naga angkon it karo bilang debosyon ukon panaad.
Matapos nga magtukod it kaugalingon nga karo , nabatyagan sigon nana nga mas pa nga nag-ugan ro anang pagpangabuhi.
Maskin nga malisod ag medyu magastos ro pagiging karo owner apang raya hay nagatau kana it kasadya .
