KALIBO, Aklan – Gusto ni Pangueong Rodrigo Duterte nga maging aktibo sa tanan nga oras ro ginbilog nga Coronavirus Task Force it natungdan nga local government units (LGUs) ag Barangay Health Emergency Team agud mapunggan ro pagkalhit it nakakamatay nga respiratory virus sa nasyon.
Raya ro uman nga ginhambae ni Aklan Governor Florencio Miraflores sa anang pagtambong sa ginpatawag nga pueong it Presidente kahapon.
Kadungan kara, nagpaguwa si Governor Miraflores it Executive Order nga nagamando sa tanan nga mga paeoparan ag pantalan sa probinsya nga makaangkon it health declaration checklist sa mga pasaherong nagasueod sa Boracay ag sa bug-os nga Aklan.
Mabahoe nga bulig sigon ro surveillance sa mga pasahero agud malikawan ro pagkalhit it sakit, ag magiging madali ro “contact tracing” sa mga igapaidaeom sa quarantine nga makitaan it sintomas it virus.
Mag-eowas sa checklist card, pagaboe-an man ro mga pasahero it body temperature gamit ro handheld thermal scanner.
Mabahoe ro pagpati it opisyal nga sa masunod nga buean ukon sa Abril hay matapos eon ro problema sa virus sa bilog nga kalibutan.
