KALIBO, Aklan—Ro tanan nga mga anti-drug operations it mga pulis hay dapat nga nasayuran it Philippine Drug Enforcement Agency ukon PDEA ag may koordinasyon sa lokal nga gobyerno.
Raya ro Standard Operating Procedure ukon SOP suno kay P/Major Frenzy Andrade, head it provincial drug enforcement agency ukon PDEU.
May kaangtanan raya sa natabu nga engkwentru sa tunga it mga operatiba it QCPD-District Special Operations Unit ag PDEA sa ginpatigayon nga anti-illegal drug operation ko Miyerkules sa Commonwealth Avenue sa Quezon City nga ginkamatay it ap-at nga katawo ag ginkanina it ap-at nga iba pa.
Nagapati si Major Andrade nga nakaangkon eamang it miscommunication rason nga natabu ro insidente.
Kon paalin nga nagresulta sa engkuwentro ag kun sin-o ro may saea hay padayun pa sigon raya nga gina-imbestigahan it national bureau of investigation kamana man it PNP ag PDEA.
Sa pihak nga parte, gindepensahan man ni Andrade ro owa pagsuksok it uniform it andang mga operatiba sa kada nagapatigayon it operasyon.
Kadungan kara, nag-apela man imaw sa mga katapo it media ag mga usyusero nga likawan nga boe-an it video ukon litrato ro andang mga intel operatives bangud nga posibleng makatuga raya it sabeag sa andang mga operasyon.
