NEWS Analysis–Nagataas ro kaso it dengue ag nagapanguna ro Metro Manila sa may pinakamaabong nagka-dengue.
Sa datos it Department of Health (DOH), may nailistang 48,109 makaron nga dag-on.
Mas mataas ro kaso makaron kaysa ko nagtaliwan nga dag-on nga 34,963.
Nailista man ro ap-at nga namatay.
Ko nagtaliwan nga dag-on, 14 ro namatay.
Ro pag-abu it dengue sa Metro Manila nga may 6,395 nga kaso hay ginabasoe sa mga nakatipon nga tubi sa mga dram ag iba pang sueodlan nga uwa it takop.
Kat makaangkon it water interruption ko Abril sa maabong lugar, maabo ro nakatipon nga tubi.
Naging breeding ground it mga eamok nga Aedes Aegypti ro tilipunan it tubi.
Nakadugang man sa pag-abo it mga eamok ro mga kanae nga uwa naga-ilig ro tubi.
Ginapamugaran man ro mga nakatambak nga basura, mga basyong bote ag ro mga pinihak nga kariton it saeakyan.
Sintomas it dengue ro mataas nga eagnat nga nagabuhay it sang dominggo, pagpanakit it ueo ag mga kasu-kasuan, pag-angkon it rashes, ag ro ihi hay kulay kape.
Ginlaygay it DOH nga kon nakaeksperyensya it makarundaya nga mga sintomas, kumunsulta eagi sa doktor para inde maglala ro dengue.
Masami nga mga onga ro biktima it dengue.
Napundo ro pagbakuna sa dengue bangud sa Dengvaxia controversy ko 2016.
Ginasuhestyon nga pasuksukon it pajama ro mga onga para may proteksiyon sa eamok.
Mag-eowas kara, maggamit it moskitero ag himuon ro 4s strategy; search and destroy breeding places, secure self-protection, seek early consultation ag support fooging ukon spraying in hotspot areas.
Paeaparo pa it DOH ro pagta-o it kasayuran sa dengue ag hugton ro kampanya para matapna ro mga eamok.
Maabo gihapon ro kueang sa kasayuran angot sa mga eamok nga nagahatod sa sakit eabi eon ro mga una sa liblib nga lugar.
Kon ro tanan hay may bastante nga kasayuran angot sa dengue, uwa it mabiktima ag mamatay.
