Kalibo Aklan ————Maeayo pa ro Commission on Elections (COMELEC) sa target nanda nga botante para sa maabot nga general election sa May 9, 2022.
Suno kay Crispin Raymund Gerardo, tagapaghambae it COMELEC-Aklan nga gustuhon man sigon it mga pumueuyu nga mag agto sa andang taeatapan agud nga magpa-rehistro, apang bangud sa paeag it COVID-19 rason nga medyu mabudlay para kanda .
Napurnada man sigon ro andang plano nga satellite registration bangud sa mga ginapangayo nga requirements ag approval it IATF ag rural health unit.
Ko Setyember 1, 2020 kat uman nga buksan ro COMELEC sa mga gustong magparehistro.
Kueabos eon sigon sanda sa oras agud nga makatipon ro ahensya it mas maabu pang botante bangud nga magasarado ro registration period sa September 30, 2021.
Samtang, ro mga pamatan-on sigon nga nagparehistro ko 2018 para sa SK elections nga nag-18 anyos makaron hay ginakabig nanda makaron nga regular voters rason nga indi eon kinahangean nga magparehistro .
Bukas sigon ro andang opisina umpisa lunes hasta biyernes alas-8 it agahon hasta alas 5 it hapon.
Hugut suno kana nga ginapatuman ro health and safety protocol sa mga gustong magpa rehistro.
Sa pihak nga parte, sa Oktubre 1 hasta 30 ro filing it Certificate of Candidacy (COC).
Mabahoe nga hangkat sa COMELEC ro pagpatigayon it eowas nga eleksyon sa atubang it away kontra COVID-19.
Mabahoe ro posibilidad nga habaan ro oras it pagboto ag dugangan ro numero it mga presinto nga anda man nga ginapahauman.
