Nakataeana sigon nga magabilog ro bag-ong Department of Information and Communications Technology (DICT) Sec. nga si Ivan Uy it task force ag complaint center para mataw-an it nagakaigo nga atensyon ro mga text scams ag illegal sites.
Ginpahayag ni Uy nga kinahangean raya nga mahimu para mapabaskog ro pagsabat sa mga cybercrimes.
Dugang pa ni Uy nga insigidas nga ginmanduan kara ro andang mga field personnel para inisigida nga mag-imbestiga ag i-report ro padayon nga operasyon it e-sabong ukon online cockfighting websites.
Bangud man sa mandu nga pagpapundo eon sa online sabong, ginaeagas eon sigon it DICT kung anong mode ro ginagamit para maipadayon ro operasyon kara.
Sa pihak kara, magapatindog man sigon sanda it central complaint center kung siin pwedeng i-consolidate ro mga reklamo kontra sa mga text scams.
Mabahoe sigon ro igabulig engkaso nga maipasa sa 19th Congress ro SIM Card registration Act.
Samtang, ginpakigbahin man ni Uy nga ginaplano eon nanda ro paglunsar it call center nga magabaton sa mga reklamo nga may kaangtanan sa serbisyo it mga telecommunication providers.
