KALIBO, Aklan—Naging madinaeag-on ro pagpatigayon it Task Resource Analysis ukon TRA sa Kalibo International Airport.
Suno kay Engr. John William Fuerte, manager it Civil Aviation Authority of the Philippines ukon CAAP-Aklan nga tuyo kara nga matumod ro staffing requirement, pag-review sa andang work load assignments ag ro pagpatigayon it mga worst case scenario nga maeapit sa kamatuoran nga posibleng matabu sa paeuparan.
Raya hay bilang pagsunod suno kana sa memorandum nga ginpaguwa it andang director general nga may petsang Pebrero 12, 2024 agud nga masukat ro ikasarang it KIA sa pagresponde engkaso nga makaangkon it insidente ukon aksidente nga eakot ro sangka eroplano.
Raya hay bilang pagsunod man sa obserbasyon it Fire Prevention Month makaron nga buean it Marso.
Ro exercise hay ginsaksihan sigon it pilang nga bisita halin sa CAAP central office.
Masunod nga magapatigayon it TRA sa Bacolod Silay Airport.
Ro mga bumbero it paeuparan ro may mabahoe nga papel sa ginpatigayon nga exercise partikular ro pagresponde sa pagkasunog it eroplano ag pag-eowas sa mga pasahero.
Kinahangean sigon nga matumod kon may mga bastante nga tawuhan ag kagamitan engkaso nga makaaangkon it aksidente sa paeuparan.
Sa pihak nga parte, sa pihak it pagbawas it mga international flights, apang kumpiyansa sanda nga sa buean it Abril ag Mayo hay uman nga magabalik ro mga direct flights halin sa Korea ag iba pang destinasyon.
Todo man sigon ro andang preparasyon nga ginahimo para sa oplan Semana Santa.
