KALIBO, Aklan—Nagahimas it maeamig nga rehas sa locked-up cell it Makato Police Station ro tatlong ka mga indibidwal matapos nga madakpan nga illegal nga naga-chainsaw it punong kahoy sa Brgy. Aglucay, Makato, Aklan.
Suno kay Police Staff Sargent James Padasas it Makato PNP, may nagreport sa andang taeatapan nga may naga-chainsaw sa nasambitang lugar.
Bangud kara, gilayon nga nagpadueong ro tropa sa area ag dikara naaktuhan ro tatlong kaeaeakin-an nga ginkilaea kanday Rouel Francisco y Castillo, 20-anyos; Cedie Castillo y Cañal, 25-anyos, parehong residente it Silakat Nonok, Brgy. Lezo; ag si Bonifacio Tiongson Jr. y De Vicente, 66-anyos ag residente it nasambitang lugar nga ginalagare ro kahoy nga “bangkae”.
May kaangtanan kara, insigida nandang gin-usuyan it permit ro mga suspek apang uwa ro mga raya it ginapakita nga nagakaigong dokumento rason nga gindakop sanda it mga pulis.
Nakumpiska sa mga raya ro ginamit nandang chainsaw, 18 bilog nga kahoy nga nagasukat it 2x3x20, ag sangka 2x3x16 nga tabla nga nagabalor it kapin sa P4,212.
Ro tatlo hay nakaeatana nga iga-inquest makaron nga adlaw sa kasong pag-eabag sa Presidential Decree 705 ukon Forestry Reform Code of the Philippines ag Republic Act 9175 ukon Chainsaw Act of 2002.
