KALIBO, Aklan—Nagapadayon ro imbestigasyon it pulisya angot sa aksidente nga nag-eontad sa Brgy. Poblacion, Balete kon siin imbolbado kara ro motorsiklo nga sumunggab sa nakaparking nga tricycle.
Angot kara, ninahan nga gindaea sa baeay paboengan ro driver nga si John Ronald Velasco, 19-anyos kaibahan ro anang angkas nga si Ryan Navarra, 18-anyos ag parehong residente it Brgy. Calizo sa nasambit nga banwa.
Samtang, nalastruhan man ro driver it tricycle nga ginkilaeang si Jorly Ambrocio, 55-anyos it Brgy. Morales, Balete.
Base sa inisyal nga imbestigasyon it Balete PNP, halin sa direksyon it banwa it Kalibo si Ambrocio kon siin nagparking raya sa kilid it karsada agud nga sueangon kunta ro anang igmanghod kat gulpi eamang nga sumunggab ro motorsiklo nga ginasakyan it daywang ka mga eaeaki.
Bangud sa kabaskog it pagkasunggab hay inapok ro mga sakay it behikulo maging si Ambrocio hay nahueog man sa anang tricycle.
Nakaangkon it nagkaeain-eain nga lastro sa kaeawasan ro mga imbolbadong indibidwal nga insigida man nga narespondehan it mga miyembro it Municipal Disaster Risk Reduction Management Office ukon MDRRMO Balete.
