KALIBO, Aklan—Nagpositibo sa Coronavirus Disease 2019 ukon COVID-19 ro tatlo sa an-om nga turistang gin-aresto bangud sa pagpameke it RT-PCR test sa pagsueod it mga raya sa isla it Boracay.
Raya hay matapos nga ginpaidaeom sa swab test ro nasambitang mga indibidwal sa Molecular Laboratory sa Aklan Provincial Hospital kung siin nagguwa nga positibo ro tatlo sa deadly virus.
Ro mga raya hay ginakaeakipan it daywang ka babaye ag sangka eaeaki nga presenteng naka-facility quarantined sa sangka hotel sa banwa it Kalibo.
Owa sigon it booking sa accredited hotel sa Boracay ro grupo it limang ka mga turista nga ginakaeakipan it sangka make-up artist, crew, entertainment manager ag TV show dancer.
Samtang, ro sambilog nga babaye hay nagatrabaho mat-a sa sangka private company.
Ginapatihan nga ro mga nasambitang turista hay nag-avail it home service para sa COVID-19 testing nga posibleng ginadumaeahan it sindikato nga sarang mag-ubra it negatibong resulta it RT-PCR test.
