Kalibo Aklan ———–Bantay sarado eon it mga kapulisan ro gintukod nga tatlong border control points sa banwa it Kalibo.
Suno kay P/Lt. Col. Belshazzar Villanoche, hepe it Kalibo Municipal Police Station nga raya hay matapos nga mas pang ginhugtan ro travel restrictions sa probinsiya it Aklan agud nga masuk-ean ro mas pang pagkalhit it COVID-19.
Mag-eowas sa andang personnel hay naghinyu sigon sanda it augmentation halin sa Aklan Police Provincial Office (APPO).
Sa Executive Order No. 005-C series of 2021, ginpahayag ni Villanoche nga hugut nanda nga igapatuman ro hugut nga travel restrictions rason nga nagtukod it border control points sa bukana it Kalibo-Numancia bridge, Barangay Tigayon ag Caano Kalibo nga magabuhay sa sueod it daywang domingo nga nag-umpisa Miyerkules , Hunyo 9 hasta 23.
Pagapasugtan ro limitadong pagguwa it mga residente, ag ro mga essentials eamang ro pagapasugtan nga magbiyahe.
Kinahangean anay nga magbo-oe it travel pass halin sa lokal nga gobyerno para sa essential travel ukon magpakita it company ID.
Gindugang pa ni Villanoche nga pagabantayan man nanda ro pagpatuman it liquor ban, curfew hour umpisa alas-9 it gabi-i hasta alas-4:00 it aga-aga kamana man ro mga nagapatigayon it mass gathering.
Magiging kabulig man nanda sa implementasyon it EO ro mga Barangay Officials.
Nagpaandam pa raya nga naga abot sa 2,500 pesos ro multa sa sin-o man nga naga-eabag sa minimum health protocol.
Ro Aklan hay sa idaeum makaron it Modified General Community Quarantine status.
Padayun makaron ro pagtaas it kaso it COVID-19 sa probinsiya.
