KALIBO, Aklan—Nakaguwa eon sa Aklan Provincial Hospital ro tatlong Chinese nationals nga temporaryong nagpabilin sa isolation ward matapos nga makitaan it sintomas it 2019-novel coronavirus.
Suno kay Dr. Cornelio Cuatchon, Provincial Health Officer II it PHO-Aklan, matapos sigon sandang maeapatan it medikasyon sa nasambitang ospital hay gilayon man sandang gin-discharge.
Ginklaro ni Dr. Cuatchon nga ro mga pasyente hay ginakaeakipan it tatlong ka mga onga nga naga-edad it an-om, lima ag waeo.
Ro lima ag waeong dag-on nga onga hay magmaeanghod nga may flu-like symptoms halin sa andang byahe sa Shanghai, China rason nga ginrefer sa provincial ospital agud nga maobserbahan.
Samtang, ro an-om nga dag-on nga ongang eaeaki hay una nga ginpakonsulta sa Ciriaco Tirol Memorial Hospital sa isla it Boracay apang ginrefer man iya sa banwa it Kalibo.
Suno pa kay Dr. Cuatchon, sa nagguwa nga confirmatory result it anang specimen ag blood sample nga ginpa-eksamin sa Research Institute for Tropical Medicine hay nagnegatibo raya sa criteria it N-CoV.
Apang, ro specimen ag blood sample it magmaeanghod hay padayon pa nandang ginahueat ro confirmatory result.
Sa makaron suno kay Dr. Cuatchon hay ginaproseso eon ro pag-uli it tatlong ka mga turista sa andang ginhalinan nga nasyon.
Nasayuran nga 24 eon lang ro ‘persons under investigation’ sa kaso it nCoV kasunod it pagguwa sa ospital it tatlo nga iya sa Aklan.
Sa makaron hay nagaabot eon sa 5,974 ro kabilugang kaso it Wuhan coronavirus sa China kon sa siin, 132 eon kara ro namatay.
