KALIBO, Aklan—Viral makarun ag naghakot it nagkaeain eain nga komento sa social media ro talong ka mga “singing lola” maghalin sa Barangay Pinamuk-an sa banwa it New Washington.
May una eun makarun nga 6.4 million views ag 15k shares ro kantang ‘Ikaw lamang ang aking iibigin’ it tatlong magmaeanghod nga puro tanan senior citizen nga ginkilaea kay ‘Lola Inday’ , 87 anyos nga imaw man ro nagabuyot it gitara kaibahan ro anang kapid nga magueang nga sanday ‘Lola Lucing ag Lola Olping nga parehong 91 anyos nga imaw man ro nagakanta.
Sa interbyu it Bombo Radyo, ginpahayag it youtube vlogger nga si Mr. Angelo Delos Santos residente it Brgy. Tambak, New Washington, Aklan ag imaw ro may bo-oe ag nag upload it nasambitan nga viral video nga kat una hay owa imaw nagaeaum nga magviral raya.
Samtang, nag-abot man sa masobra 1M views ro sambilog pang video it mga “singing lola” samtang nagakanta it “happy birthday” song bilang kaparte it andang bonding kasunod it pagselebrar sa ika-87 anyos nga birthday ni lola inday.
Raya man sigon ro anang pinakaunang video nga gin-upload sa youtube.
Sa makarun hay tuyo man it aklanon vlogger nga si Delos Santos nga mabuligan ro tatlong ka mga “singing lola” nga una sa likod it anang mga viral videos sa youtube.
Suno kana nga nagahueat eun lang imaw it google adsense pin.
Nasayuran nga kung monetize eun it youtube ro sangka vlooger hay pwedi rayang kumita it kwarta nga nakadepende sa anang mga views ag gina-upload nga videos.
