Kapin sa 80 kilos ro kabug-at it tatlong ka mga taklobo nga ginturn-over it sangka persona sa Bureau of Fisheries and Aquatic Resources ukon BFAR Aklan.
Suno kay Kalyp Silverio, fishery regulation officer it BFAR Aklan, ginakabig nga endangered species ro mga taklobo rason nga ginabawaean ro pagbaligya kara.
Ro madakpan hay magapangatubang sa multa nga P500 pesos hasta it masobra sa sang milyong pesos.
Aminado si Silverio nga may nagakolekta it mga taklobo sa pag-eaum nga maibaligya nanda raya sa mahae nga presyo apang hugot raya nga ginabawaean sandig sa agreement nga ginsudlan it Pilipinas.
Ginpahayag dugang nga pwede idisplay sa andang panimaeay apang inde pwede nga ipaguwa maskin kanyo ag maskin siin nga lugar.
Sa kamatuoran suno kana bukon eamang it mga taklobo ro andang naaprehend kundi iba pang klase it mga shells.
Ginatipon nanda raya antes nga daehon tanan sa regional office sa andang warehouse para i-safe keeping.
